31/10/2018
Այսօր նախադպրոցական դաստիարակների վերապատրաստման հինգերորդ օրն էր։ Օրն սկսեցինք Սուրբ Երրորդություն եկեղեցուց, մասնակցեցինք ժամերգությանը և քայլքով դեպի Արևմտյան դպրոց գնացինք։ Արևմտյան դպրոց-պարտեզում սկսեցինք երգեր-պարերգերով, որին հաջորդեց տեխնոլոգիական պլեները։ Ապա՝ սուրճի ընդմիջում, հարց-պատասխան, ամփոփում և, իհարկե, վկայականների հանձնում սփյուռքի նախարարի՝ Մխիթար Հայրապետյանի և կրթահամալիրի տնօրեն Աշոտ Բլեյանի ջերմ բարեմաղթանքներով ողողված:
Ահա և Էջմիածնի «Ոստան» մանկապարտեզի փոխտնօրեն Ամալյա Ավագյանի տպավորությունները։
2018թ. հոկտեմբերի 22-26-ը մասնակցեցինք «Մխիթար Սեբաստացի» կրթահամալիրի վերապատրաստման դասընթացներին։ Այս հինգ օրերի ընթացքում ստացանք շատ գեղեցիկ տպավորություններ, որոնք մեզ հետ կտանենք սիրով։ Կրթահամալիրում մեզ ընդունեցին շատ սիրալիր և ջերմ։ Շնորհակալ ենք յուրաքանչյուրին այս անմիջականության համար։ Այստեղ մեզ շատ դուր եկավ այն, որ ազգային-ծիսական արարողությունները շատ գեղեցիկ մատուցվում են և՛ երեխաներին, և՛ հյուրերին երգերի և խաղիկների միջոցով։ Սովորեցինք մի քանի երգեր, պարերգեր և այդ ամենը մեծ սիրով կաշխատենք փոխանցել մեր մանկական հաստատություններում։
Հատուկ շնորհակալություն մեր ընկեր Նելիին, Տաթևին, Սաթենին, Արմինեին, երաժշտության ղեկավար ընկեր Մարինեին, Սոֆյային իրենց արհեստավարժ աշխատանքի համար։ Շնորհակալությունների շարքը ուզում եմ շարունակել…
Ուզում ենք շնորհակալություն հայտնել նաև խոհանոցի աշխատակիցներին՝ մեզ այդ հինգ օրերի ընթացքում համեղ և սիրալիր կերակրելու համար։Շնորհակալություն ընկեր Նառային և կրթահամալիրի տնօրեն տիար Աշոտ Բլեյանին։
Սիրով՝ Էջմիածնի թիվ 16 «Ոստան»մանկապարտեզի փոխտնօրեն՝ Ամալյա Ավագյան և երաժշտության դաստիարակ՝ Մանուշ Աբրահամյան։
Կարծիք գրել